كُل

اتخلص من الدهون بطريقة تبديل الكربوهيدرات

الكل بيتكلم عن دايت تبديل الكربوهيدرات (Carb Cycling Diet) ومزاياه في تنزيل دهون الجسم. الطريقة سهلة جدا باختصار إنك تبدل كميات الكربوهيدرات في نظامك الغذائي من يوم للثاني من كميات عالية لكميات محدودة مع الحفاظ على البيروتيين والدهون.

بالأسلوب ده جسمك بيدخل في وضع خاص ويعمل استجابة قوية لعملية (Anabolic) ويحافظ بأكبر قدر من العضلات وتنزيل الدهون في نفس الوقت.الموضوع سهل جدا وهنشرحلك دورة الدايت لمدة 4 أيام تقدر تعمل من 7 – 14 دورة على حسب امتى وصلت لهدفك

اليوم الأول: يوم الكربوهيدرات المتوسطة

الكربوهيدرات 1.5 جرام لكل 1 كيلو من وزنك
البروتين 1 جرام لكل 1 كيلو من وزنك
الدهون 0.3 جرام لكل 1 كيلو من وزنك

جسمك هياخد اللي محتاجة عشان يقوم بعملياته الحيوية وحاول توزع وجباتك من 4 – 6 وجبات في اليوم لو تقدر

اليوم الثاني: يوم الكربوهيدرات القليلة

الكربوهيدرات 0.5 جرام لكل 1 كيلو من وزنك
البروتين 1.5 جرام لكل 1 كيلو من وزنك
الدهون 0.3 جرام لكل 1 كيلو من وزنك

في اليوم ده قلل الكربوهيدرات وخد نسبة عالية من البروتين عشان تعوض جسمك عن الجلوكوز اللي هيخسره بسبب قلة الكربوهيدرات وتحافظ على الكتلة العضلية. في اليوم ده جسمك هيعتمد على الدهون الزيادة المتخزنة كمصدر للطاقة

اليوم الثالث: يوم الكربوهيدرات القليلة

الكربوهيدرات 0.5 جرام لكل 1 كيلو من وزنك
البروتين 1.5 جرام لكل 1 كيلو من وزنك
الدهون 0.3 جرام لكل 1 كيلو من وزنك

نفس نظام اليوم التاني الجسم هيستهلك الجلوكوز المتخزن في الدم والجليكوجين اللي في الكبد والعضلات الي اقصى حد واول ما يخلصهم هيبدأ في تكسير الدهون الي الجلسريب والاحماض الدهنية اللي هتتحول الي جلوكوز متاكسد

اليوم الرابع: يوم الكربوهيدرات العالي

الكربوهيدرات 4 -5 جرام لكل 1 كيلو من وزنك
البروتين 1 جرام لكل 1 كيلو من وزنك
الدهون 0.2 جرام لكل 1 كيلو من وزنك

ده أحسن يوم في الدورة كلها لان جسمك هيعوض نسبة الجليكوجين المفقودة في العضلات وهيستخدم الكربوهيدرات بفاعلية وهيخزنها على هيئة جليكوجين وهيكون نسبته تحويل الكربوهيدرات الى دهون منخفضة جدا وهتلاقي عضلاتك منفوخة لان كل 1 جرام من الجليكوجين بيتحول الى 4 جرام ميه. خلي اليوم ده نفس اليوم اللي هتدرب فيه تدريب جامد زي الرجليين مثلا

الخلاصة انه لما تبدل نسبة الكربوهيدرات في اكلك جسمك مش هيعرف يتأقلم مع نسبة السعرات الحرارية المتكررة و مش هيبطأ عملية التمثيل الغذائي (الأيض) بالعكس هيبدأ يحرق الدهون بسبة اعلى – عشان تنجح الدايت ده لازم تلعب معاه تمارين مكثفة و شاقة زي ال HIIT مثلا.